عادات مكاويه في الاكل ..

كيفكمـ ..؟!

الموهيم لقيت دآ الموضوع عن العادات فـ مكـآ عن الأكل مرآ حماسسَ ..

الأكلات المكية لها طعم ونكهة ونشأة

واللي يحلي الأكلات ويطعمها زيادة إنو لكل أكلة مناسبة تتعلق بيها

وما ياكلوها إلا في المناسبة حقتها هما كدة المكاويه وبالزات العتقية القدامى

تصانيف وتباتيك في الاكل والشرب مايعلم بيها الا الله عز وجل

ماشية معانا من أيام ما فنو الأوادم ..

أقروا الموضوع

ومخمخو وبعدين قولوا رأيكم عن هادي العادات طيب يا سيدي انت وهو والكلام للجميع

الأكلات المكية ترتبط بعادات ومناسبات يعني كل اكلة وليها مناسبة زي أيش ؟!

هيا خدو عندكم ..

الكابلي أو الزربيان والسمبوسك والطورمبة هادي يسووها وقت المناسبات والأفراح للرجال

أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال

بس يسوو قليل بريك او بف بالجبنة والا باللحمة شغل بيتي يعني واللي تعرف تسوي كيك

بالبرتكان او الموز تسوي صينية علشان يحلو بيها بعدين جانا الميز والشغلات الجديدة هادي ..

المعدوس ( الرز عدس ) هادا يسووه المكاكوة يوم الغيم والمطر ومعاه روبيان مكشن بالقوطة

والبصل والفلفل الأخضر وزلطة حمر

وكيف لوكنا ساكنين في بلاد الخواجات على كدة كل يوم معدوس ألين البطن تسير زي الطبلة

~>هههههههههههه

الرز بحمبص والسقط والمعرق أو المختوم والششني هادي الأكلات خاصة بالعزا وزيادة في

التوضيح اليوم الأول والتاني والتالت يطبخو الرز البحمبص واليوم التالت اللي يسموه قطع العزا

يسوو الششني والمعرق والمختوم والسقط ..

الملوخية الخضرا هادي تتعمل في اليوم الأول من السنة الهجرية الجديدة على الغدا من باب

التفائل إنو ربنا يجعلها سنة خضرا وخير للجميع ..

الحليب أبو الهيل هادا برضو كمانة ينشرب في صبحية أول يوم في السنة الهجرية الجديدة

~> دآ كل يوم في الصبوح قبل المدرسـه Cant See Images

السليق هادا يسووه في المناسبات لمن يكون الجو باااااااااااااااااارد

الدبيازة معروفة على ما أعتقد للجميع يسووها للفطور أول يوم العيد

المعمول والغريبة يسووها في أيام الحج

السمك مايتاكل إلا في الشعبنة علشان في رمضان

الناس ماتاكل السمك بس هيا كدة عادة

شعبنة يعني اضرب سمك وصيادية

عشرة عاشورا ( 10 محرم ) رز زربيان الحلو وزلطة لبن أبو الفلفل ..

السحلب يسووه في الأيام الباردة علشان يلم العضم ويدفي الجتة بالزات لو فيلو شوية جنزبيل

القهوة الملوزة اللي يحطولها لوز بجلي مهروش طبعا هادي وقت البزورة ما ينجحو

والا يسقطو يسوولهم هيا قيد ماتفرق

لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة ..

وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها

من السنة للسنة ..

المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس

وتولد إلا يصنجوها مغراف مجلب علشان يكرت وصخ البطن والولادة وينضفها

الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد ..

السلالي والمقلقل واللحم نفتكر على طول عيد الحج يندبح الطلي

ومايبقى شي منو تبارك الرحمن ..

كل شي يتاكل فيه حتى الرجول يسوو بيها مقادم والمفاصل نلعب بيها كبوش والفروه يفرشوه

على عتبة البيت زي الدعاسات دحين والديل نشوح البزورة بيه زي البواكير

وكمان التقاطيع ودي الحاجات أكيد نسيوهـآ ..

زي ماشفتو الأكلات اللي قلنا عليها لها مناسبة أو وقت معينه تتاكل فيها

مع انو يمدينا ناكلها طووووووووووول السنة مو مشكلة ويمكن كتير ناس هجروا

وفلتو تباتيك زمااان الا مارحم الله بس هيا زي ماتقولوا شغلة تعود

وعلى قولت المسل الله لايقطع العادة إلا بسلامة ..

وإن شالله يعجبكمـ الموضوع ..

يسلمووووو ياقمرهومـ موضوعكـ خطير
معـ تحيآأآتيـ -_*

يسلموو ع مرورك ياقمر

وربي خطااااره يسلموؤوؤ

يسلموووو على المووووضووع
اكيد عجبنا

يسلمو عالموضوع وربي عيطيكي الف عااافيه

» امتنعي عن الاكل بعد الثامنه تضمني الرشاقه>>